ಬೆಂಗಳೂರು: ಪರಭಾಷಿಕರೆ ಹೆಚ್ಚಿರುವ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಕನ್ನಡ ಭಾಷಾ ಬಳಕೆಯೇ ಕಡಿಮೆಯಾಗುತ್ತಿದೆ. ಅಂತಹದರಲ್ಲಿ ಆಟೋ ಚಾಲಕರೊಬ್ಬರು ಅನ್ಯಭಾಷಿಕರಿಗೆ ಪ್ರಯಾಣದ ಸಮಯದಲ್ಲಿ ಕನ್ನಡ ಕಲಿಸುವ ಮೂಲಕ ಮಾದರಿಯಾಗಿದ್ದಾರೆ.
ಹೌದು, ಬೆಂಗಳೂರಿನಲ್ಲಿ ಆಟೋ ಓಡಿಸುವ ಅಜ್ಜು ಸುಲ್ತಾನ್ ಎಂಬುವರು ಕನ್ನಡ ಗೊತ್ತಿಲ್ಲದ ಅನ್ಯ ಭಾಷಿಕರಿಗೆ ‘ಲರ್ನ್ ಕನ್ನಡ ವಿತ್ ಆಟೋ ಕನ್ನಡಿಗ’ ಎಂಬ ವಿಶಿಷ್ಟ ಅಭಿಯಾನದ ಮೂಲಕ ಪರ ಭಾಷಿಗರಿಗೆ ದಿನ ಬಳಕೆಯ ಕನ್ನಡ ಪದಗಳನ್ನು ಕಲಿಸುವ ಮೂಲಕ ಜನರ ಮೆಚ್ಚುಗೆಗಳಿಸಿದ್ದಾರೆ.
ಆಟೋ ಚಾಲಕನ ಈ ಸಿಂಪಲ್ ಐಡಿಯಾಗೆ ಸೋಶಿಯಲ್ ಮೀಡಿಯಾದಲ್ಲಿ ವ್ಯಾಪಕ ಬೆಂಬಲ ವ್ಯಕ್ತವಾಗಿದೆ. ಆಟೋ ಚಾಲಕ ತನ್ನ ಆಟೋದಲ್ಲಿ ಕನ್ನಡ ಕಲಿಯುವ ಪೋಸ್ಟರ್ ಅನ್ನು ಅಂಟಿಸಿದ್ದಾರೆ. ಇದು ಅನ್ಯ ಭಾಷಿಕ ಪ್ರಯಾಣಿಕರಿಗೆ ಆಟೋದಲ್ಲಿ ಪ್ರಯಾಣ ಮಾಡುವ ಸಮಯದಲ್ಲಿಯೇ ಕನ್ನಡ ಕಲಿಯುವ ಅವಕಾಶ ಮಾಡಿದ್ದಾರೆ.
ಇದರಲ್ಲಿ ಕನ್ನಡ ಮತ್ತು ಇಂಗ್ಲಿಷ್ ಎರಡೂ ಅನುವಾದವುಳ್ಳ ಪದ,ವಾಕ್ಯಗಳ ಪೋಸ್ಟರ್ ಹಾಕಿದ್ದಾರೆ ಇದರಿಂದ ಕನ್ನಡ ಬರದವರು ಸುಲಭವಾಗಿ ಕನ್ನಡದಲ್ಲಿ ವ್ಯವಹರಿಸಬಹುದಾಗಿದೆ. ಈ ಪೋಸ್ಟರ್‌ನಲ್ಲಿ ಕನ್ನಡದಲ್ಲಿ ದೈನಂದಿನವಾಗಿ ಆಟೋ ಡ್ರೈವರ್ ಜೊತೆ ಗ್ರಾಹಕರು ಬಳಕೆ ಮಾಡುವ ಹಲವು ಕನ್ನಡ- ಇಂಗ್ಲೀಷ್ ವಾಕ್ಯಗಳಿವೆ. ‘Namasakara sir’ (Hello, sir)
‘Elli idira’ (Where are you?), “Yeshtu aaytu” (How much?) m “UPI idya athva cash aa?” (Is it UPI or cash?) ಎನ್ನುವ ಕನ್ನಡ -ಇಂಗ್ಲೀಷ್ ಅನುವಾದ ಸಾಲುಗಳನ್ನು ಪೋಸ್ಟರ್ ನಲ್ಲಿ ಬರೆದು ಆಟೋದಲ್ಲಿ ಹಾಕಿದ್ದಾರೆ.
ಅಷ್ಟೆ ಅಲ್ಲದೆ ಪೋಸ್ಟರ್ ಗಳನ್ನು ಈ ಆಟೋ ಚಾಲಕ ಆನ್‌ಲೈನ್‌ನಲ್ಲೂ ಹಂಚಿಕೊಂಡಿದ್ದಾರೆ. Instagram, YouTube ಮತ್ತು Facebook ನಂತಹ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿಯೂ ಕೂಡ ಕನ್ನಡ ಕಲಿಯುವ ಪೋಸ್ಟರ್ ಗಳನ್ನು ಶೇರ್ ಮಾಡಿದ್ದಾರೆ.
ಆಟೋ ಚಾಲಕರು ಮತ್ತು ಪ್ರಯಾಣಿಕರ ನಡುವಿನ ಭಾಷಾ ತಡೆಯನ್ನು ಕಡಿಮೆ ಮಾಡುವ ಉದ್ದೇಶ ನನ್ನದಾಗಿದೆ. ಈ ಪೋಸ್ಟರ್ ಅನ್ನು ಬೆಂಗಳೂರಿನಾದ್ಯಂತ ಅತಿ ಹೆಚ್ಚು ಆಟೋಗಳಲ್ಲಿ ಅಂಟಿಸುವ ಪ್ರಯತ್ನ ಮಾಡಲಾಗುತ್ತಿದೆ. ಈ ಮೂಲಕ ಅನ್ಯಭಾಷಿಕರಿಗೆ ಕನ್ನಡ ಕಲಿಸುವ ಪ್ರಯತ್ನ ನನ್ನದು ಎನ್ನುತ್ತಾರೆ ಆಟೋ ಚಾಲಕ ಅಜ್ಜು ಸುಲ್ತಾನ್. ಇವರ ಕನ್ನಡ ಕಲಿಸುವ ಪ್ರೀತಿಗೆ ಎಲ್ಲರೂ ಶಹಬ್ಬಾಸ್ ಹೇಳೋಣ.